తరువులన్నీ యిచ్చిన చిన్ని  చిన్ని  విత్తనాలను  తెచ్చుకున్నాను ,                                                                  
పొందికగా  అందంగా  నా చిన్ని  తోటలో  చల్లుకున్నాను ,                                                                                  
నారు పోసి  నీరు  పోసి  కలుపు  తీసి  కళ్ళతో  కాపాడుకున్నాను ,                                                                      
ఎదుగుతున్న  మొక్కలను  తడికళ్ళతో  తనివితీరా  చూసాను ,                                                                              
చిన్ని  సన్నజాజి  తీగ  నన్ను  చుట్టేసింది ,                                                                                                      
ఎర్ర గులాబీ  తమకంతో  నన్ను  ముద్దాడింది ,                                                                                                  
పరువాల  చామంతి  పకపకా  నవ్వింది ,                                                                                                          
ఓరగా  కోరగా  మామిడి  పిందె  నన్ను  చూసి  కళ్ళు  తిప్పింది ,                                                                        
అందాల  నా  తోటలో  తరులు  విరులు నవ  వసంత  రాగ  రంజితాలు ,                                                                      
ఋతువులన్ని  కాలగతిలో  చక  చకా తిరిగాయి ,                                                                                        
మొక్కలన్నీ  రెక్కలొచ్చి  యెగిరి  పోయాయి ,                                                                                              
తరులన్నీ తెరవు కోసం  తరలిపోయాయి ,                                                                                                    
ఒకనాటి  వసంతాన్ని  బీడుపడిన  నా  తోటలో  ,                                                                                            
మసక  బారిన  కన్నులతో  వేయి  కళ్ళతో  వెతికాను ,                                                                                    
కానరాక  వేదనతో  కనుకొలకుల  కన్నీరుతో  తరలిపోయాను  నేస్తమా !!!